И тропари трипеснца Триоди, глас 4.

Тропарь: Стра́сть Тебе́ безстра́стнаго зря́щи тва́рь, сострада́ше Ти́ Долготерпели́ве: со́лнце угаса́ше, ка́мение же распада́шеся, вся́ земля́ тряса́шеся, стра́хом зову́щи: Го́спода по́йте дела́, и превозноси́те во вся́ ве́ки.

Стих: Благослови́те сы́нове челове́честии, да благослови́т Изра́иль Го́спода, по́йте и превозноси́те Его во ве́ки.

Тропарь: Звере́м лю́тым тро́стным, Бо́же мо́й Ще́дрый запрети́, вну́трь мя́ оскорбля́ющым, Спа́се, безче́стное досажде́ние претерпе́вый, бие́мь тро́стию Христе́, почести́ хотя́ вся́ безче́ствованныя преступле́нием дре́вним.

Стих: Благослови́те свяще́нницы Госпо́дни, раби́ Госпо́дни, Го́спода, по́йте и превозноси́те Его во ве́ки.

Тропарь: Во у́м егда́ прие́млю стра́шное Твое́ суди́ще, Судие́ пра́веднейший, трепе́щу, и ужаса́юся, страшу́ся, и рыда́ю, помышля́я дела́ моя́ осужде́нию досто́йная. Те́мже мно́гое Твое́ благоутро́бие Спа́се молю́: да не победи́т Тя́ мно́жество зо́л мои́х.

Стих: Благослови́те ду́си и ду́ши пра́ведных, преподо́бнии и смире́ннии се́рдцем, Го́спода, по́йте и превозноси́те Его во ве́ки.

Богородичен: Роди́вшая Тя́ без боле́зни, боле́знем в Твое́м распя́тии подлежу́, опаля́ется утро́ба Моя́: гвоздьми́ бо пригвозди́лся еси́, копие́м в ре́бра Твоя́ пробода́емь долготерпели́ве, Пречи́стая вопия́ше Де́ва: Ю́же я́ко Богоро́дицу согла́сно воспева́ем.

Стих: Благослови́те Ана́ния, Аза́рия, Мисаи́л, Го́спода, по́йте и превозноси́те Его во ве́ки.

И тропари инаго трипеснца Триоди, глас тойже:

Тропарь: Да то́чат го́ры разу́мно пра́вду, и хо́лми да веселя́тся, Дре́во кре́стное покланя́емо ви́дяще: его́же превозно́сим Христе́ во ве́ки.

Стих: Благослови́те апо́столи, проро́цы и му́ченицы Госпо́дни, Го́спода, по́йте и превозноси́те Его во ве́ки.

Тропарь: Благода́ть Креста́ Твоего́ стра́шная: и́бо де́монов изгоня́ет полки́, челове́ком подаю́щи исцеле́ний во́ды: те́мже Тя́ пое́м Христе́ во ве́ки.

Благослови́м Отца́ и Сы́на и Свята́го Ду́ха, Го́спода.

Троичен: Безнача́льнаго Отца́, и Сы́на со Святы́м воспои́м Ду́хом, Тро́ицу единосу́щную, еди́но нача́ло, и Бо́га хва́ляще, пою́ще Его́ благоче́стно во ве́ки.

И ны́не и при́сно и во ве́ки веко́в. Ами́нь.

Богородичен: Вся́к язы́к земноро́дный пое́т Тя́ Де́во, я́ко све́т непристу́пный возсия́ла еси́, просвеща́ющий ми́р, Христа́ Бо́га: Его́же превозно́сим при́сно во ве́ки.

Тропарь: Ра́дуются концы́ земни́и поклоне́нию Креста́ Твоего́ Человеколю́бче: а́нгели на небесе́х ликовству́ют дне́сь с на́ми, пою́ще Тя́ Христе́ во ве́ки.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Ирмос, глас 4: Вся́ дела́ Бо́жия, и вся́ тва́рь,/ благослови́те Го́спода,/ я́ко челове́ком от земли́ возсия́ све́т,/ и вселе́нную всю́ просвети́,/ и жи́знь ве́чную ми́ру дарова́,/ по́йте лю́дие,// и превозноси́те Его́ во ве́ки.

Священник: Богоро́дицу и Ма́терь Све́та в пе́снех возвели́чим.

Лик: Вели́чит душа́ Моя Го́спода, и возра́довася дух Мой о Бо́зе, Спа́се Мое́м.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Я́ко призре́ на смире́ние Ра́бы Своея́, се бо от ны́не ублажа́т Мя вси ро́ди.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л и вознесе́ смире́нныя, а́лчущия испо́лни благ и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его да́же до ве́ка.

Ирмос, глас 8: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.

Стих: Благослове́н Госпо́дь Бог Изра́илев, я́ко посети́ и сотвори́ избавле́ние лю́дем Свои́м.

Тропарь: Исцели́л еси́ Преблаги́й мое́ сокруше́ние, на Кресте́ пригвожда́емь гвоздьми́ иногда́, рука́ма Твои́ма и нога́ма Всецарю́, и в ре́бра пробода́емь, о́цтом напая́емь и же́лчию, все́х весе́лие, сла́дости сла́во, ве́чное избавле́ние.

Стих: И воздви́же рог спасе́ния нам, в дому́ Дави́дове о́трока Своего́.

Тропарь: Красе́н па́че сапфи́ра и зла́та, светоза́рен я́ко со́лнце еси́ боже́ственный Кре́сте: лежа́ у́бо ме́стом опи́сан, и у́мными си́лами всю́ду окружа́емь стра́шно, луча́ми же боже́ственными твоея́ си́лы, просвеща́яй вселе́нныя исполне́ния.

Стих: Я́коже глаго́ла усты́ святы́х, су́щих от ве́ка проро́к Его́.

Тропарь: Кре́ст обурева́емых е́сть приста́нище, наста́вник заблужда́ющих и утвержде́ние, сла́ва Христо́ва, си́ла апо́столов и проро́ков, по́стников держа́ва, все́х челове́ков прибе́жище. того́ посреде́ предлежа́ща вси́ зря́ще, воздержа́нием лобыза́им.

Стих: Спа́сение от враг на́ших и из руки́ всех ненави́дящих нас.

Тропарь: Егда́ и́маши приити́ на зе́млю суди́ти ми́ру, его́же созда́л еси́ Го́споди, а́нгельским предыду́щым Твои́м во́инством, и Кресту́ просиява́ющу па́че заре́й со́лнечных. того́ могу́тством уще́дри мя́, и спаси́ па́че все́х челове́ков прегреши́вшаго.

Стих: Сотвори́ти ми́лость со отцы́ на́шими и помяну́ти заве́т святы́й Свой.

Богородичен: Тле́ния Тя́ кроме́ роди́х из чре́ва, пре́жде ве́к его́же оте́ц роди́: и ка́ко тле́еши? Челове́цы терза́ют Тя́ Сы́не, и ре́бра ископова́ют копие́м, и ру́це с нога́ма пригвожда́ют безчелове́чно, Всечи́стая вопия́ше: Ю́же досто́йно велича́ем.

Стих: Кля́тву, е́юже кля́тся ко Авраа́му отцу́ на́шему, да́ти нам без стра́ха, из руки́ враг на́ших изба́вльшимся.

Тропарь: Дре́вом кре́стным пла́мень увяди́л еси́ греха́ Христе́: ру́це же распросте́р, руки́ изба́вил еси́ борца́, неудержа́нно просте́ршаго ру́це к сне́ди плода́, его́же еди́наго бежа́ти вкуше́ния уста́вил еси́, Христе́ многоми́лостиве.

Стих: Служи́ти Ему́ преподо́бием и пра́вдою пред Ним вся дни живота́ на́шего.

Тропарь: Стра́сть Твою́ Христе́, все́м челове́ком безстра́стие источа́ющую, чи́сто ви́дети сподо́би, в безстра́стии покланя́ющыяся Твоему́ Кресту́ честно́му, грехи́ на́шя презира́я, и воскре́сния и́стиннаго сы́ны соде́ловая.

Стих: И ты, отроча́, проро́к Вы́шняго нарече́шися, преды́деши бо пред лице́м Госпо́дним угото́вати пути́ Его́.

Тропарь: Вознесы́й на́с па́дшыя в сме́рть, Воскре́снием Твои́м разреши́л еси́ бра́нь, и Отцу́ Твоему́ на́с примири́л еси́, о на́с кро́вь Твою́ излия́вый Благоде́телю: те́мже Тя́ сла́вим, я́ко Бо́га Изба́вителя всеси́льна.

Стих: Да́ти ра́зум спасе́ния лю́дем Его́, во оставле́ние грех их, милосе́рдия ра́ди ми́лости Бо́га на́шего.

Богородичен: Еди́на Бо́жию му́дрость роди́вшая ипоста́сную, умудри́ мя, молю́ся, зло́бы мудреца́ убежа́ти сове́тов, и ловле́ний, и кова́рств, Богоро́дице Де́во неискусобра́чная, твердое ве́рных прибе́жище.

Стих: В ни́хже посети́ нас Восто́к с высоты́, яви́тися во тьме и се́ни сме́ртней седя́щим.

Тропарь: Кре́ст честны́й, его́же объе́млют а́нгельская во́инства, и мы́ кла́няющеся велича́ем.

Стих: Напра́вити но́ги наша на путь ми́рен.

Тропарь: Дре́во пречи́стое, и́мже причасти́хомся жи́зни, пре́жде уме́ршии, Кре́ст Спа́сов велича́ем.

Троичен: Отца́ безнача́льна, Сы́на собезнача́льна, и Ду́ха сопресто́льна, Тро́ицу Святу́ю велича́ем.

И ны́не и при́сно и во ве́ки веко́в. Ами́нь.

Богородичен: Ма́терь безневе́стную, и Де́ву вси́ Чи́стая воспева́ем Тя́: без се́мене бо Созда́теля родила́ еси́.

Тропарь: Сподо́бившыяся ви́дети тя́, и поклони́тися, благопоспе́шствуй, предвари́ти пресвяту́ю стра́сть, Кре́сте Христо́в.

Ирмо́с, глас 4: Безсе́менное Рождество́ Твое́, Богоро́дице Чи́стая,/ Христа́ Бо́га на́шего,// пе́сньми немо́лчными велича́ем.

Лик: Досто́йно есть я́ко вои́стинну блажи́ти Тя Богоро́дицу, При́сноблаженную, и Пренепоро́чную, и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем. (И поклон.)

Заступи́, спаси́, поми́луй и сохрани́ нас, Бо́же, Твое́ю благода́тию.

Пресвяту́ю, Пречи́стую, Преблагослове́нную, Сла́вную Влады́чицу нашу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Священник: Я́ко Тя хва́лят вся си́лы небе́сныя и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

ЧТО ТАКОЕ УВЕРЕННОЕ ПОВЕДЕНИЕ В МЕЖЛИЧНОСТНЫХ ОТНОШЕНИЯХ? Исторически существует три основных модели различий, существующих между...

Что делает отдел по эксплуатации и сопровождению ИС? Отвечает за сохранность данных (расписания копирования, копирование и пр.)...

ЧТО ПРОИСХОДИТ, КОГДА МЫ ССОРИМСЯ Не понимая различий, существующих между мужчинами и женщинами, очень легко довести дело до ссоры...

ЧТО И КАК ПИСАЛИ О МОДЕ В ЖУРНАЛАХ НАЧАЛА XX ВЕКА Первый номер журнала «Аполлон» за 1909 г. начинался, по сути, с программного заявления редакции журнала...

Не нашли то, что искали? Воспользуйтесь поиском гугл на сайте: